ሻቢ አሎንሶ የቼልሲ ዋና አሰልጣኝ ለመሆን በመርህ ደረጃ ተስማማ

ቅዳሜ ዕለት በኤፍኤ ካፕ የፍፃሜ ጨዋታ በማንቸስተር ሲቲ 1 ለ 0 የተሸነፉት ቼልሲዎች፣ ውጥንቅጥ የበዛበትን የውድድር ዘመን ተከትሎ ክለቡን እንደገና ለመገንባት ተዘጋጅተዋል። በባለፈው የፈረንጆች አዲስ ዓመት ዕለት ኢንዞ ማሬስካ በግርግር መልቀቃቸውን ተከትሎ ክለቡ ተናውጦ የነበረ ሲሆን፣ ጣሊያናዊውን ተክተው የመጡት ሮሴኒየርም ከስድስት ዓመት ተኩል ኮንትራታቸው ውስጥ 106 ቀናትን ብቻ ካገለገሉ በኋላ ባለፈው ወር መባረራቸው ሁኔታውን ይበልጥ አባብሶታል። የሮሴኒየር መባረር በቼልሲ ከፍተኛ አመራሮች ላይ ጫና የፈጠረ ሲሆን፣ ክለቡ ወደ “ራስን መፈተሻ” ጊዜ እንዲገባ አድርጎታል።

ቼልሲ በእንግሊዝ ወይም በአውሮፓ ከፍተኛ ደረጃ ላይ ልምድ ያለው አሰልጣኝ ለማግኘት ትኩረት ሰጥቶ የነበረ ሲሆን፣ አሎንሶን ደግሞ ለዚህ ሚና ብቁ እጩ አድርገው ተመልክተውታል። የቀድሞው የሊቨርፑል፣ ባየር ሙኒክ እና ሪያል ማድሪድ አማካይ፣ በ2024 ባየር ሌቨርኩሰንን ለቡንደስሊጋ ዋንጫ ድል ሲያበቃ በአውሮፓ ካሉ ምርጥ ወጣት አሰልጣኞች አንዱ መሆኑን አስመስክሯል። በ2022 ብሉኮ (BlueCo) የተባለው ጥምረት ክለቡን ከተቆጣጠረ በኋላ ስድስተኛው ቋሚ አሰልጣኝ የሚሆነው አሎንሶ፣ በማድሪድ የነበረው አጭር ቆይታ ቅሬታ ፈጥሮበት እንደነበር ይታወሳል።

የቼልሲ የእጩዎች ዝርዝር ፊሊፔ ሉዊስ፣ አንዶኒ ኢራኦላ፣ ኦሊቨር ግላስነር እና ማርኮ ሲልቫን ቢያካትትም፣ ክለቡ አሎንሶን ቢያንስ ለሦስት ዓመታት ሲከታተለው ቆይቷል። ቼልሲ አሎንሶ ነፃ እስኪሆን ሲጠብቅ የነበረ ሲሆን፣ አሁን ግን የሚፈልገውን ሰው ለማግኘት ተቃርቧል። አርኔ ስሎትን ይዘው ለመቀጠል ያሰቡት ሊቨርፑል አሎንሶን ለማግኘት ዘግይተው ሙከራ ስለማድረጋቸው ምንም ምልክት የለም። የቀድሞው የስፔን ብሔራዊ ቡድን አማካይ በአንፊልድ ለአምስት ዓመታት በተጫዋችነት ያሳለፈ ሲሆን፣ በ2005 የአውሮፓ ሻምፒዮንስ ሊግን እና በ2006 የኤፍኤ ካፕን ማሸነፉ ይታወሳል።

በብሉኮ ባለቤትነት ስር ላለፉት አራት ዓመታት ለሦስተኛ ጊዜ ለሻምፒዮንስ ሊግ ማለፍ ያልቻሉት ቼልሲዎች፣ አሎንሶን መቅጠራቸው እንደ ትልቅ ስኬት ይቆጠርላቸዋል። አሎንሶ በድርድሩ ወቅት ስለሚሰጠው ሚና ማረጋገጫ እንደፈለገ ይታመናል። ምንም እንኳን የቼልሲ የተጫዋቾች ምልመላ በአምስት ስፖርታዊ ዳይሬክተሮች የሚመራ ቢሆንም፣ አሎንሶ በአዳዲስ ተጫዋቾች ግዢ ላይ ትልቅ ድምፅ ይኖረዋል ተብሎ ይጠበቃል። ላለፉት ዓመታት ወጣት ተሰጥኦዎችን በመግዛት ላይ ትኩረት ተደርጎ የቆየ ቢሆንም፣ በዚህ ክረምት ግን ቢያንስ ሁለት ልምድ ያላቸውን ተጫዋቾች ለማስፈረም እቅድ ተይዟል።

ቼልሲ የውድድር ዘመኑን በጊዜያዊ አሰልጣኙ ካለም ማክፋርላን እየመራ የሚጨርስ ሲሆን፣ በአውሮፓ ውድድሮች የመሳተፍ ዕድሉም አነስተኛ ነው። ሆኖም ክለቡ አሁንም ለትላላቅ አሰልጣኞች ማራኪ መሆኑ እንደቀጠለ ግልጽ ነው። አሎንሶ በእንግሊዝ ለመስራት ፍላጎት ያለው ሲሆን፣ አሁኑኑ የቼልሲ ተጫዋቾችን ድጋፍ አግኝቷል። አሎንሶ ወደ ስታምፎርድ ብሪጅ ማቅናቱ፣ ክሪስታል ፓላስ የውድድር ዘመኑ ሲጠናቀቅ ቦርንመዝን የሚለቀቀውን ኢራኦላን ለመቅጠር መንገዱን ሊያመቻችለት ይችላል። ግላስነርም በዚህ ወር መጨረሻ ከኮንፈረንስ ሊግ የፍፃሜ ጨዋታ በኋላ ፓላስን እንደሚለቁ ታውቋል።