“እኔ ጣሊያናዊ ነኝ፣ በጣሊያንም ሁኔታው ተመሳሳይ ነው” ብለዋል ዴ ዜርቢ። “ለትልልቅ ቡድኖች ሁኔታው ያው ነው። ጫናውን መቀበል አለብን። በዚህ ጫና መደሰት ይኖርብናል። ከዚህ ጫና አዲስ መነሳሳትን መፍጠር አለብን። ይህ ለእኛ ጥሩ ነገር ነው። ሁሉም ሰው ቶተንሃም እንዲወርድ የሚፈልግ ከሆነ፣ ይህ ለእኔም ሆነ ለተጫዋቾቼ ትልቅ መነሳሳት እንደሚሆን ተስፋ አደርጋለሁ። እግር ኳስ በፉክክር የታጀበ በመሆኑ ደስ የሚል መሆኑን መቀበል አለብን። በስታዲየማቸው ድላችንን ስናከብር ማሰብ ጥሩ ነው። ሁሉም ሰው ቶተንሃም እንዲወርድ የሚፈልግ ከሆነ፣ ለአንድ የቶተንሃም ተጫዋች፣ ደጋፊ ወይም በክለቡ ውስጥ ለሚሰራ ማንኛውም ሰው ይህ ትልቁ መነሳሳት ሊሆን ይገባል” ሲሉ አክለዋል።
ስፐርሶች ባለፉት አስርት ዓመታት በስታምፎርድ ብሪጅ ያገኙት ብቸኛ ድል እ.ኤ.አ. በ2018 በማውሪሲዮ ፖቸቲኖ ስር ደሌ አሊ ሁለት ግቦችን አስቆጥሮ 3-1 ሲያሸንፉ ነበር። ዴ ዜርቢ በመጋቢት ወር መጨረሻ ከኢጎር ቱዶር ሀላፊነቱን ሲረከቡ፣ ስፐርሶች ከታህሳስ 28 በክሪስታል ፓላስ ካሸነፉ በኋላ በሊጉ ድል አላገኙም ነበር። ነገር ግን በሶስተኛ ጨዋታቸው ዎልቭስን ካሸነፉ በኋላ፣ አስቶንቪላን በማከታተል በማሸነፍ ከወራጅ ቀጠናው መውጣት ችለዋል። “ዛሬ ጠዋት ስለ ስታምፎርድ ብሪጅ ታሪካችን ተነጋግረናል” ያሉት ዴ ዜርቢ፣ “ነገር ግን ነገ ጥሩ ጨዋታ ተጫውቶ ነጥብ ለማግኘት ከሁሉ በላይ አስፈላጊው ነገር የመንፈስ ጥንካሬና ስብዕና ነው። ከዎልቭስ ጨዋታ በፊት የመጨረሻውን ድል ያገኘነው ታህሳስ 28 እንደነበርና ከዚያ በኋላ ግን ሁለት ተከታታይ ጨዋታዎችን ማሸነፋችንን አስረድቻለሁ። ዋናው ነገር ታሪኩ ሳይሆን ጨዋታውን የምንጀምርበት ስሜት ነው” ብለዋል።
ዴ ዜርቢ ዶሚኒክ ሶላንኬ አሁንም በጉዳት ላይ ቢሆንም ጉሌልሞ ቪካሪዮ ግን ለጨዋታው ዝግጁ መሆኑን ተናግረዋል። አሰልጣኙ አንደኛ ግብ ጠባቂያቸውን መልሰው የመሰለፍ ወይም በአንቶኒን ኪንስኪ የመቀጠል ውሳኔ የሚያሳልፉ ቢሆንም፣ በኪንስኪ ላይ እምነት የሚጥሉ ይመስላል። ይህ ጨዋታ እ.ኤ.አ. በግንቦት 2016 የተደረገውንና 12 ተጫዋቾች (ዘጠኙ ከስፐርስ) ቢጫ ካርድ የታዩበትን ታዋቂውን “የብሪጅ ጦርነት” ያስታውሳል። ያ ጨዋታ 2-2 መጠናቀቁን ተከትሎ ስፐርሶች ለዋንጫ የነበራቸው ተስፋ ሲያበቃ ሌስተር ሲቲ ሻምፒዮን መሆኑ ይታወሳል። በዚህ የውድድር ዘመን ስፐርሶች 91 ቢጫ እና 4 ቀይ ካርዶችን በመመልከት በዲሲፕሊን ረገድ የሊጉ መጥፎ ታሪክ ያላቸው ሲሆን፣ ቼልሲዎች 81 ቢጫ እና 7 ቀይ ካርዶችን በመመልከት ሁለተኛ ደረጃ ላይ ይገኛሉ። ዴ ዜርቢ ተጫዋቾቻቸው ስሜታቸውን እንዲቆጣጠሩ አሳስበዋል። “ሁልጊዜም በረጋ መንፈስ፣ በስብዕና እና በትክክለኛ መንፈስ መሆን አለብን። ትኩረታችንን ጨዋታው ላይ ብቻ እናድርግ። ምክንያቱም ባለፈው ከሊድስ ጋር 1-1 በወጣንበት ጨዋታ፣ ኪንስኪ በመጨረሻው ሰዓት ኳስ ባዳነበት ወቅት በጣም ተቻኩለን ነበር። አንዳንድ ጊዜ ረጋ ማለት ይኖርብናል” ሲሉ ተናግረዋል።