ስለ ፈርናንዴዝ ልግስና የሚወሩ በርካታ ታሪኮችን ስንሰማ ደግሞ ነገሩ ይበልጥ ግልጽ ይሆናል። በ2024 ጂም ራትክሊፍ ወጪያቸውን ለመሸፈን ፈቃደኛ ካልሆኑ በኋላ ወደ ዌምብሌይ ለሚጓዙ የዩናይትድ ሰራተኞች የጉዞ እና የማረፊያ ወጪን ለመሸፈን ያቀረበው ጥያቄ አንዱ ነው። ክለቡ በአስቸጋሪ ሁኔታ ውስጥ በነበረበት ወቅት የቡድን አንድነትን ለማጠናከር የራት ግብዣ ማዘጋጀቱ፣ ለሴቶች ቡድን ተጫዋቾች ቤተሰቦች የኤፍኤ ካፕ ፋይናል ትኬቶችን ማመቻቸቱ፣ እና ለማያውቃቸው ደጋፊዎች በፖስታ የተፈረመበት ማሊያ ወይም ስጦታ መላኩም ይነገራል። በራትክሊፍ አስተዳደር ስራቸውን ያጡ ሰራተኞች እንኳን ፈርናንዴዝ አሁንም ድረስ ደውሎ ደህንነታቸውን እንደሚጠይቅ ይመሰክራሉ። አዳዲስ ተጫዋቾች ሲመጡም እንዲላመዱ የሚያግዝ የደስታ መልእክት ያዥጎደጉድላቸዋል። ማቲውስ ኩኛ ክለቡን ሲቀላቀል ፈርናንዴዝ ቁርስ እንደጋበዘው ያስታውሳል። ሌኒ ዮሮም የመኖሪያ ቤት ፍለጋ እርዳታ እንደፈለገ ፈርናንዴዝ እንደጠየቀው ይናገራል። ራትክሊፍ የዩናይትድ ተጫዋቾች “ከመጠን በላይ ይከፈላቸዋል” እና “ብቁ አይደሉም” ብለው ሲያማርሩ፣ በይፋ ወጥቶ የተከላከላቸው ፈርናንዴዝ ነበር። ባጭሩ ፈርናንዴዝ በሜዳ ላይ ብቻ ሳይሆን ከሜዳ ውጭም ለክለቡ ትልቅ ድጋፍ እየሰጠ ነው።
ምናልባት በፕሪምየር ሊግ ታሪክ ካዩት ምርጥ የአማካይ ክፍል ብቃት አንዱን እያሳየ ባይሆን ኖሮ ይህ ሁሉ ትርጉም ባልነበረው ነበር። ነገር ግን ፈርናንዴዝ የ2026ቱን ዩናይትድ ከማንም በላይ ይወክላል። እሱ የአማካይ ክፍሉ ሞተር እና ካፒቴን ብቻ ሳይሆን የክለቡ ልብ እና ሰብአዊ ገጽታም ነው። በግላዘር አስተዳደር ውስጥ እውነተኛ እና አስፈላጊው አካል እሱ ነው። በመሆኑም ባለፈው ክረምት አል-ሂላል እና ሌሎች ክለቦች ሲፈልጉት፣ ክለቡ እሱን ለመሸጥ ዝግጁ ነበር። ለንግድ አስተሳሰቡ ብሩኖን መሸጥ ምክንያታዊ ይመስላል። እድሜው ከ30 በላይ ሆኗል፣ ደመወዙም ከፍተኛ ነው። ፕሪምየር ሊጉ ደግሞ ከጊዜ ወደ ጊዜ ጉልበት የሚጠይቅ እየሆነ መጥቷል። አዲሱ አስተዳደር ደግሞ ወጪን መቀነስ እና ብልጥ የንግድ ልውውጥን ይፈልጋል። ለብሩኖ ወደ 100 ሚሊዮን ፓውንድ የሚጠጋ ገንዘብ ሲቀርብ “ሽጡት” የሚል ውሳኔ መምጣቱ አይገርምም።
እውነታው ግን ፈርናንዴዝ ቢጠየቅ ኖሮ ይሄድ ነበር። ለክለቡ ካለው ፍቅር የተነሳ የክለቡ የገንዘብ ሁኔታ የሚጠይቅ ከሆነ ራሱን መስዋዕት ለማድረግ ዝግጁ ነበር። ነገር ግን ከዩናይትድ በኩል ግልጽ የሆነ አቋም አልታየም። ፈርናንዴዝ ሁኔታዎችን መረመረ፣ የክለቡን የክረምት ዝግጅት ተመለከተ፣ ህሊናውን አማከረ እና በመጨረሻም ህይወቱን ሊቀይር የሚችል እጅግ ከፍተኛ ክፍያ ያለውን እድል ውድቅ አደረገ። አሁን ደግሞ 16 አሲስቶችን በማስመዝገብ በቲየሪ ኦንሪ እና ኬቪን ደ ብሩይን የተያዘውን የፕሪምየር ሊግ ታሪክ ክብረወሰን እየተገዳደረ ይገኛል። በመከላከሉም ረገድ እንደ ኢብራሂማ ኮናቴ በርካታ ኳሶችን ነጥቋል፣ እንደ ሞይስ ካይሴዶም ኳስ በማስመለስ ረገድ ውጤታማ ሆኗል። ኳስ በእግሩ ሲገባ የሚፈጠረው ጉጉት እና አንድ የሚገርም ነገር እንደሚሰራ ያለው እርግጠኝነት ልዩ ነው። በጨዋታዎች መጨረሻ ላይ በድካም እና በህመም ውስጥ ሆኖ እንኳን የሚታገለው ትግል ይገርማል። ይህ የውድድር ዘመን እንደ ሌሎቹ ያለ ዋንጫ ሊጠናቀቅ ይችላል፣ ነገር ግን አንድ ነገር ግልጽ ሆኗል። ሰር አሌክስ ፈርጉሰን ስራ ካቆሙ በኋላ ዩናይትድ ላለፉት አስር አመታት የሚመጥናቸውን ተተኪ ሲፈልጉ ቆይተዋል። ምናልባትም የተሳሳተ ቦታ ነበር ሲፈልጉ የነበሩት። በስራ አባዜው፣ በቁጣው፣ በታክቲክ እውቀቱ እና በሁሉም ቦታ ለመገኘት በሚያደርገው ጥረት ፈርናንዴዝ ምናልባትም ለፈርጉሰን የቀረበው ብቸኛ ሰው ሊሆን ይችላል።
ስለ ስራ አባዜ ስናወራ በምክንያት ነው። ይህ ሰው በእረፍት ሰዓቱ በአይፓዱ የፖላንድ ሊግን ሲመለከት ወይም ስህተቱን ለማረም ያለፉ ጨዋታዎቹን ሲመረምር ይታያል። ከሁለት አመት በፊት ለ’አ ቦላ’ በሰጠው ቃለ ምልልስ ከፖርቹጋል የቡድን አጋሮቹ ጋር ለመጣጣም አጨዋወቱን እንዴት እንደሚቀይር በዝርዝር አስረድቶ ነበር። በርናርዶ ሲልቫ ኳስ ከኋላ አይፈልግም፣ ራፋኤል ሌአኦ ለአንድ ለአንድ ግንኙነት ኳስ ይፈልጋል፣ ጆአኦ ፌሊክስ በመስመሮች መካከል ኳስ ይፈልጋል፣ ፔድሮ ኔቶ ደግሞ ኳስ እግሩ ላይ እንዲመጣለት ይመርጣል። ክርስቲያኖ ደግሞ አጠር ያሉ ቅብብሎችን ይወዳል። ይህ ሁሉ ስለ እግር ኳስ ብቻ የሚያስብ አእምሮ ውጤት ነው። ስለ ፈርናንዴዝ ተጫዋችነት ምንም አይነት አመለካከት ቢኖራችሁ፣ እዚህ ጋር አንድ ትልቅ ፍቅር አለ። ምርጥ አመታቱን በዚህ እየሰመጠ ባለ መርከብ ላይ ያሳለፈ፣ በፌዝ እና በውድቀት ውስጥ ያለፈ፣ የአሰልጣኞች መቀያየርን እና የሮይ ኪን ትችቶችን የተቋቋመ ሰው ነው። የብሩኖ ፈርናንዴዝ እና የማንቸስተር ዩናይትድ ታሪክ አመት ከዓመት የተቆለፈን በር እንደሚመታ ሰው ነው። ምንም እንኳን ማስረጃው ባያሳይም፣ አንድ ቀን በሩ እንደሚከፈት በፅኑ ያምናል። በውሉ ላይ አንድ አመት ብቻ ነው የቀረው፣ እናም የወደፊት ቆይታው አጠራጣሪ ሊመስል ይችላል። ነገር ግን በተቃራኒው ስሩን በክለቡ ውስጥ ይበልጥ እያሰረ እና ታሪኩን በወርቅ ቀለም እየጻፈ ይገኛል። እሱ ክለቡን ከራትክሊፍ ወይም ከሌሎች አመራሮች በላይ ጠንቅቆ ያውቀዋል። ፈርናንዴዝ ዩናይትድን ከውድቀት እየታደገ ብቻ አይደለም፤ ምናልባትም ክለቡን ከራሱ ከጥፋት እየታደገው ሊሆን ይችላል።