ስለ ጨዋታው ግምገማ የተጠየቀው ማርቲኔዝ ሲመልስ፡ “በጣም ደካማ፣ እጅግ በጣም ደካማ ነበር። ራሴን ለመቆጣጠር ብዙ መሞከር አለብኝ፤ ነገር ግን አንዳንድ ጊዜ ይህ በክለባችን ውስጥ ያለውን ወቅታዊ ሁኔታ የሚያሳይ መስታወት ነው። እዚህ መጥተን ቡድኔ አስደናቂ ውጤት ለማምጣት ሲጥር አለማየቴ ያበሳጫል፣ ያስቆጫልም” ብሏል።
ተከላካዩ አክሎም “መቶ በመቶ ተጨማሪ ኢንቨስትመንት እጠብቅ ነበር። ከቴክኒክ ዳይሬክተራችን [ጄሰን ዊልኮክስ] የበለጠ ነገር እፈልጋለሁ። እውነቱን ለመናገር እኛ እንደ ተጫዋች የበለጠ መስራት አለብን፤ ነገር ግን እንዲህ አይነት ምሽቶችን ለመጋፈጥ ጠንካራ ስብስብ መገንባትም እኩል አስፈላጊ ነው። ባለፈው የውድድር ዘመን ሁሉንም ነገር አድርገናል፤ ለታላቅ ቡድን የሚሆን መሰረትም ጥለን ነበር” ብሏል።
ማንችስተር ዩናይትድ ባለፈው የውድድር ዘመን በሚካኤል ካሪክ ስር ካደረጋቸው 17 ጨዋታዎች 12ቱን ማሸነፍ ችሎ ነበር። ሆኖም በክረምቱ የዝውውር መስኮት ካርሎስ ባሌባ፣ አንድሬ ሳንቶስ እና ዩሪ ቲሌማንስን ብቻ ያስፈረመ ሲሆን፣ ተጠባባቂ ግብ ጠባቂውን ካርል ዳርሎውን ደግሞ ከሊድስ በነፃ ዝውውር አግኝቷል። ቡድኑ በዚህ የውድድር ዘመን በሁሉም ውድድሮች ማሸነፍ የቻለው ሁለት ጊዜ ብቻ ሲሆን፣ ይህም በ40 ዓመታት ውስጥ የክለቡ እጅግ አስከፊ የሊግ አጀማመር ሆኖ ተመዝግቧል።
አሰልጣኙ በቂ ድጋፍ ተደርጎላቸዋል ወይ ተብሎ ሲጠየቅ ማርቲኔዝ፡ “አልመስለኝም። እሳቸው የተቻላቸውን እያደረጉ ነው። እያንዳንዱ የውድድር ዘመን የተለየ ነው። ባለፈው አመት በሰራኸው ነገር ላይ ብቻ ተመስርተህ መቆየት አትችልም። ተቀናቃኞች እንዴት እንደምትጫወት እና እያንዳንዱን ዝርዝር ነገር ያውቁታል። ለቀጣዩ አመት ለውጥ ካላደረግክ ትልቅ ችግር ይፈጠራል። አሰልጣኙን ደጋግሞ መቀየር መፍትሄ አይሆንም። ስለሌሎች ክፍሎችስ ምን ይባላል?” ሲል በድጋሚ ወደ ላይ እያየ ተናግሯል።
የማርቲኔዝ አስተያየት የቀረበላቸው አሰልጣኝ ካሪክ በበኩላቸው፡ “ቃለ መጠይቁን አላየሁትም፤ ስለ እሱ አንዳንድ ነገሮችን ብቻ ነው የሰማሁት። ንግግሩ ከጨዋታው ስሜት ጋር ተዳምሮ የመጣ ይመስለኛል። ምን መደረግ እንዳለበት ለመወሰን በመጀመሪያ ስለ ጉዳዩ በዝርዝር ማወቅ ይኖርብኛል። አሁን ላይ ተጨማሪ አስተያየት መስጠት አልችልም” ብለዋል።
የዩናይትድ አሰልጣኝ ቡድናቸው አራት ለግብ የቀረቡ የፊት ለፊት አጋጣሚዎችን ማግኘቱን የገለጹ ሲሆን፣ የሌኒ ዮሮ የቀይ ካርድ ውሳኔም እንዳልገባቸው ተናግረዋል። “ጥልቅ የሆነ ችግር እንዳለ አድርጎ ማሰብ ቀላል እንደሆነ አረዳለሁ፤ ነገር ግን ተጫዋቾቹ ድንቅ ነበሩ። ፍላጎት አላቸው፤ ከዚህ ጨዋታ ነጥብ ይዘው ባለመውጣታቸውም አዝነዋል። ነጥብ ማግኘት ይገባን ነበር ብለን እናምናለን” ሲሉ አክለዋል።