ገለልተኛው ኮሚሽን ማንቸስተር ሲቲ በባለቤቶቹ አቡ ዳቢ ዩናይትድ ግሩፕ በምስጢር የገንዘብ ድጋፍ የሚደረግላቸውን “ሀሰተኛ” የስፖንሰርሺፕ ውሎችን በመጠቀም ገቢውን በ900 ሚሊዮን ፓውንድ አሳብጦ አሳይቷል በሚል ጥፋተኛ ብሎታል። የተባበሩት አረብ ኤምሬትስ ብሔራዊ አየር መንገድ የሆነው ኢትሃድ፣ ከ2009 ጀምሮ የሲቲ ዋና ማሊያ ስፖንሰር ሲሆን፣ ለክለቡ የገቢ ዕድገት መነሻ የሆነው ዋነኛው የገቢ ምንጭ ነው። እ.ኤ.አ. በ2011 ሲቲ ለኢትሃድ ስታዲየም የስም መብት በ400 ሚሊዮን ፓውንድ የሚገመት የ10 ዓመት ውል መፈራረሙን ያስታወቀ ሲሆን፣ ውሉ በ2021 በተሻሻለ ክፍያ ተራዝሟል።
መግለጫው “ኢትሃድ ኤርዌይስ ማንቸስተር ሲቲን በተመለከተ የፕሪሚየር ሊጉ ኮሚሽን ያወጣውን አስተያየት እና የፕሪሚየር ሊጉን ይፋዊ መግለጫ መርምሯል” ይላል። “አየር መንገዱ ተገቢ ባልሆነ የንግድ ስምምነት ውስጥ ገብቷል የሚል ማንኛውንም ግኝት፣ መደምደሚያ ወይም ፍንጭ ኢትሃድ በፅኑ ይቃወማል። ፕሪሚየር ሊጉ በተመረጡ መረጃዎች መውጣትና ሪፖርቶች የታጀበውን የኮሚሽኑን ግኝቶች ይፋ ማድረጉ፣ ምንም እንኳን አየር መንገዱ በታተመው ሰነድ ላይ ስሙ ባይጠቀስም በኢትሃድ ላይ ጎጂ ተጽዕኖዎችን ፈጥሯል” ሲልም አክሏል።
ኢትሃድ የማንቸስተር ሲቲ ዋና ስራ አስፈጻሚ ፌራን ሶሪያኖ ለሰራተኞች በላኩት ቪዲዮ ላይ የተጠቀሙበትን ቃል በመድገም፣ የኮሚሽኑ ውሳኔ “አስተያየት” ብቻ መሆኑን ገልጿል። በተጨማሪም ፕሪሚየር ሊጉ በምርመራው ወቅት ከአየር መንገዱ ጋር አልተማከረም ሲል ወንጅሏል። “ፕሪሚየር ሊጉ ከኮሚሽኑ አስተያየት ጋር በተያያዘ በነበረው ሂደት ውስጥ በማንኛውም ጊዜ ከኢትሃድ ጋር ግንኙነት አላደረገም” ብሏል።
“በመሆኑም ኢትሃድ በፕሪሚየር ሊጉ በኩል ወካይ እንዲኖረው፣ ተገቢ መረጃዎችን እንዲያቀርብ ወይም አሁን በአየር መንገዱ ላይ አሉታዊ ተጽዕኖ ሊያሳድሩ በሚችሉ መደምደሚያዎች ላይ የተመሰረቱ መረጃዎች ትክክለኛነት እና ፍትሃዊነት እንዲረጋገጥ ዕድል አልተሰጠውም። ኢትሃድ ጉዳዩ ለህዝብ ይፋ በሆነበት መንገድ በእጅጉ አዝኗል። ግልጽነት ማጣት እና መረጃዎችን መርጦ ይፋ ማድረግ፣ አየር መንገዱ በውሳኔው ውስጥ ባይጠቀስም ጉዳት አድርሷል። ፕሪሚየር ሊጉ እነዚህ ግኝቶች የቀረቡበት መንገድ ለሚያስከትለው ውጤት ኃላፊነቱን መውሰድ አለበት” ብሏል።
“ኢትሃድ ከማንቸስተር ሲቲ ጋር ባለው የረጅም ጊዜ ግንኙነት በእጅጉ ይኮራል። የኢትሃድ ስም ለብዙ ዓመታት በክለቡ እና በስታዲየሙ ላይ በኩራት ታይቷል፤ ይህም በዓለም ዙሪያ ካሉ በሚሊዮን የሚቆጠሩ ደጋፊዎች ጋር ያገናኘን አጋርነት አካል ነው። ለማንቸስተር ሲቲ፣ ለደጋፊዎቹ እና ለጋራ አጋርነታችን ያለን ቁርጠኝነት እንደጸና ይቆያል። ማንቸስተር ሲቲ በህጋዊ መንገዶች የኮሚሽኑን መደምደሚያዎች በሚቃወምበት ወቅት ከክለቡ፣ ከደጋፊዎቹ እና ከኢትሃድ ማህበረሰብ ጋር እንቆማለን። ኢትሃድ ጥቅሙን ለማስጠበቅ ባሉት አማራጮች ላይ ተገቢውን የህግ ምክር ይፈልጋል” በማለት መግለጫውን አጠቃሏል።