ጉዳዩ በአፋጣኝ የሚታይ ከመሆኑ አንጻር፣ ኔቶ ቼልሲ ፒኤስጂን በመጪው ማክሰኞ በሚያስተናግድበት የሁለተኛ ዙር ጨዋታ ላይ እንዳይሰለፍ ሊታገድ ይችላል። ከእገዳው በተጨማሪ የገንዘብ ቅጣት ወይም ማስጠንቀቂያ ሊሰጠው እንደሚችል ተጠቁሟል። ድርጊቱ የተፈጠረው ኳስ ከሜዳ ወጥቶ በውርወራ ለመጀመር ኔቶ ኳሱን ለመቀበል በሞከረበት ወቅት ነበር። የቀድሞው የዎልቭስ ተጫዋች ቦልቦዩን በመግፋቱ ልጁ መሬት ላይ የወደቀ ሲሆን፣ ሁኔታው በተቃራኒ ቡድን ተጫዋቾች መካከልም ግጭት ቀስቅሶ ነበር።
ኔቶ ከጨዋታው በኋላ ለፈጸመው ድርጊት ፈጣን ምላሽ ሰጥቷል። ለቲኤንቲ ስፖርት (TNT Sport) ሲናገርም “ቦልቦዩን ይቅርታ መጠየቅ እፈልጋለሁ፤ ቀደም ብዬም አነጋግሬዋለሁ” ብሏል። “ተሸንፈን ስለነበር በጨዋታው ስሜት ውስጥ ሆኜ ኳሱን በፍጥነት ለማግኘት ስል በትንሹ ገፍቼው ነበር። እኔ እንዲህ አይነት ሰው አይደለሁም። በወቅቱ በነበረው ስሜት የተፈጠረ ነው፣ ለዚህም ይቅርታ እጠይቃለሁ። ማሊያዬንም ሰጥቼዋለሁ፤ በእውነት አዝናለሁ – እሱን ይቅርታ መጠየቅ እንዳለብኝ ይሰማኛል” ሲል ተናግሯል።
የቼልሲው ዋና አሰልጣኝ ሊያም ሮሲኒየርም በጉዳዩ ላይ ያላቸውን ቅሬታ ገልጸዋል። “ከቦልቦዩ ጋር የተፈጠረውን አለመግባባት አይቻለሁ” ያሉት አሰልጣኙ፣ “ከእኛ ወገን ስህተት ወይም ከአግባብ ውጪ የሆነ ነገር ተፈጥሮ ከሆነ በክለቡ ስም ይቅርታ እጠይቃለሁ። ነገር ግን ፔድሮ በቃለ መጠይቁ ይቅርታ የጠየቀ ይመስለኛል። እኔ ግን ድርጊቱን በድጋሚ በቪዲዮ አላየሁትም” ብለዋል። በዘንድሮው የውድድር ዘመን የዲሲፕሊን ጉድለት በቼልሲ ላይ በተደጋጋሚ የሚታይ ችግር ሆኗል። ቡድኑ ዘጠኝ ቀይ ካርዶችን የተመለከተ ሲሆን፣ ኔቶ ራሱ በዚህ ወር በአርሰናል በተሸነፉበት ጨዋታ በሁለት ቢጫ ካርድ ከሜዳ መውጣቱ ይታወሳል። ሮሲኒየርም ተጫዋቾቻቸው ባህሪያቸውን እንዲያሻሽሉ በተደጋጋሚ ሲያሳስቡ ቆይተዋል።