የፕሪሚየር ሊግ ዳኞችና ተጫዋቾች ንግግር በድምፅ ሊተላለፍ ነው

እነዚህ በዳኞች ራስ ላይ የሚታሰሩ ካሜራዎች ተመልካቾች በጨዋታው ወቅት የተከሰቱ ኩነቶችን በአዲስ እይታና በቅርብ ርቀት እንዲመለከቱ በማድረግ የደጋፊዎችን ልምድ ለማሻሻል ጥቅም ላይ ሲውሉ ቆይተዋል። ሆኖም ከክለቦች ጋር በተደረገው ስምምነት መሰረት፣ በካሜራዎቹ የተቀረጹ ድምፆች ከጥቂት ቀናት በኋላ ካልሆነ በቀር በወቅቱ አይተላለፉም ነበር። ‘ዘ ጋርዲያን’ እንደተረዳው ከሆነ፣ በዚህ የውድድር ዘመን ደንቦቹ የሚላሉ ሲሆን፣ በእያንዳንዱ 38 የጨዋታ ሳምንታት ውስጥ አንድ ወይም ሁለት ኩነቶች በሪፍካም ድምፅ ታጅበው እንዲተላለፉ ይደረጋል።

ይሁን እንጂ ድምፆቹ በቀጥታ ስርጭት ወቅት ወዲያውኑ የሚሰሙ አይሆኑም፤ እንዲሁም በአለም አቀፉ የእግር ኳስ ማህበር ቦርድ (Ifab) ህግ መሰረት በቪዲዮ ረዳት ዳኛ (VAR) የሚታዩ ኩነቶችን አይጨምርም። አዲሱ የድምፅ አገልግሎት የሚቀርበው ከጨዋታው ኩነት ጥቂት ቆይታ በኋላ በሚታዩ የድግግሞሽ ምስሎች (replays) ላይ ሲሆን፣ የሪፍካም ቴክኖሎጂ ጥቅም ላይ የሚውልባቸው የጨዋታዎች ብዛትም ከ20 ወደ 45 ከፍ እንዲል ተደርጓል።

እግር ኳስ እንደ ክሪኬት፣ ራግቢ እና የተለያዩ የአሜሪካ ስፖርቶች በጨዋታ ወቅት የሚደረጉ ቃለ መጠይቆችን እና የአልባሳት መቀየሪያ ክፍል ካሜራዎችን የመሳሰሉ የቴክኖሎጂ ፈጠራዎችን ለመቀበል ዘግይቷል። አሁን ግን የስርጭት መብት ባለቤቶች እያሳደሩት ባለው ጫና ምክንያት፣ ስፖርቱ ራሱን ይበልጥ ክፍት እያደረገ ይገኛል። የፕሪሚየር ሊጉ እና የዳኞች አካል የሆነው ‘ፕሮ ሪፍ’ (Pro Ref) – የቀድሞው PGMOL – የቀጥታ ድምፅ ስርጭትን የሚከለክሉ ደንቦች እንዲላሉ ለአለም አቀፉ የእግር ኳስ ማህበር ቦርድ (Ifab) ግፊት እያደረጉ መሆኑ ተሰምቷል።