ይህንን ለማሳካት ክለቡ “የተሸሸገ የገንዘብ ድጋፍ ዘዴ” (Disguised Funding Scheme) የተባለ አሰራርን ተግባራዊ ማድረጉን ኮሚሽኑ አረጋግጧል። በዚህም መሰረት ክለቡ ከአቡ ዳቢ ስፖንሰሮች ጋር ከገበያ ዋጋ በላይ የሆኑ ስምምነቶችን ቢፈራረምም፣ ስፖንሰሮቹ ግን የተመዘገበውን ክፍያ ሙሉ በሙሉ የመክፈል ግዴታ አልነበረባቸውም። ስፖንሰሮቹ “መሰረታዊ ክፍያ” ተብሎ የሚጠራውን ጥቂት ገንዘብ ብቻ የሚከፍሉ ሲሆን፣ ቀሪው “ታግድ ሰም” (tagged sum) የተባለው ከፍተኛ ክፍያ በሼክ መንሱር ወይም በእሳቸው ቁጥጥር ስር ባለው አቡ ዳቢ ዩናይትድ ግሩፕ (ADUG) አማካኝነት ይከፈል ነበር። ይህም ክለቡ ከአቡ ዳቢ ስፖንሰሮች የሚያገኘው ገቢ ከእውነታው እጅግ የላቀ መስሎ እንዲታይና የባለቤቱ የገንዘብ ድጋፍ መጠን ተደብቆ እንዲቆይ አስችሏል። በዚህም ምክንያት እያንዳንዱ የአቡ ዳቢ ስፖንሰርሺፕ ስምምነት “የሐሰት” ነው ሲል ኮሚሽኑ ደምድሟል።
እንደ ኮሚሽኑ ስሌት ከሆነ፣ ከ2009-10 እስከ 2017-18 ባሉት ዘጠኝ የውድድር ዓመታት ውስጥ ማንቸስተር ሲቲ ከአቡ ዳቢ ኩባንያዎች 949.94 ሚሊዮን ፓውንድ የገቢ ስምምነት እንዳለው መዝግቧል። ሆኖም ከዚህ ውስጥ 119.25 ሚሊዮን ፓውንድ ብቻ በመደበኛነት የተከፈለ ሲሆን፣ ቀሪው 830.69 ሚሊዮን ፓውንድ በባለቤቱ ድርጅት (ADUG) የተሸፈነ ነው። ይህ 830 ሚሊዮን ፓውንድ በምርመራ ወቅት ክለቡ ካገኘው ጠቅላላ ገቢ ውስጥ እስከ 30 በመቶ የሚሆነውን ይሸፍናል። ይህ መጠን ከሌሎች የፕሪሚየር ሊግ ተቀናቃኞቻቸው ጠቅላላ ገቢ እጅግ የላቀ ነው። ይህም ድጋፍ በጊዜ ሂደት እየጨመረ የመጣ ሲሆን፣ በ2009-10 የነበረው 22.5 ሚሊዮን ፓውንድ በ2017-18 ወደ 134.73 ሚሊዮን ፓውንድ አድጓል።
ኮሚሽኑ ክሶቹን በአራት ዘርፎች የከፋፈላቸው ሲሆን፣ የመጀመሪያው ትክክለኛ የፋይናንስ መረጃ አለመስጠት የሚለው ክስ ከተረጋገጠ በኋላ ሌሎች ክሶች እንደ ዶሚኖ ተከታትለው መጥተዋል። ማንቸስተር ሲቲ የዩኤፋን እና የፕሪሚየር ሊጉን የፋይናንስ ደንቦች አለማክበሩ የተረጋገጠ ሲሆን፣ ከዚህም በተጨማሪ የፕሪሚየር ሊጉን ምርመራ ለማደናቀፍ የተቀናጀ ጥረት ማድረጉ ተገልጿል። ክለቡ ለተሸሸገው የገንዘብ ድጋፍ ዘዴ እውነታውን ለመደበቅ ሲል “የተቀነባበሩ” ማብራሪያዎችን መስጠቱንም ኮሚሽኑ አክሏል።
ከዚህም በላይ ክለቡ በምርመራው ወቅት ያቀረባቸው ምስክሮች በበርካታ ቁልፍ ጉዳዮች ላይ ሆን ብለው “የሐሰት ምስክርነት” መስጠታቸውንና ሃቀኝነት የጎደለው ተግባር መፈጸማቸውን ኮሚሽኑ በጽኑ ወቅሷል። ከዚህ በተጨማሪ እንደ ሮቤርቶ ማንቺኒ እና ያያ ቱሬ ላሉ የቀድሞ ሰራተኞች በኮንሰልታንት ስም የተከፈለ ከ15 ሚሊዮን ፓውንድ በላይ ክፍያ በውል ላይ አለመመዝገቡ ተገኝቷል። እንዲሁም “ፎርድሃም” የተሰኘው የተጫዋቾች የምስል መብት ስምምነት ለባለቤቱ ድርጅት ሽፋን ለመስጠት የተደረገ ሌላኛው የሐሰት አሰራር መሆኑ ተረጋግጧል።
በሁለቱ ወገኖች መካከል የነበረው ክርክር እጅግ የከረረ እንደነበርና የቀረቡት ሰነዶች በብዙ ሺህ የሚቆጠሩ ገጾች እንደነበሩ ተገልጿል። ጉዳዩ ረጅም ጊዜ የፈጀውም በዚህ ምክንያት እንደሆነ ኮሚሽኑ ገልጿል። ማንቸስተር ሲቲ በበኩሉ ምንም አይነት ጥፋት እንዳልፈጸመ በመግለጽ፣ ውሳኔው በሕግና በሐቅ ላይ የተመሰረተ አይደለም በሚል ይግባኝ እንደሚጠይቅ አስታውቋል። የክለቡ ዋና ስራ አስፈጻሚ ፈራን ሶሪያኖ ውሳኔው በፕሪሚየር ሊጉ “የሴራ ቲዎሪ” ላይ የተመሰረተ ነው ሲሉ ለሰራተኞቻቸው ገልጸዋል።